Kundur yelimi tabiiy
Kundur yelimi rus tilida ladan, arab tilida lozan deyiladi
U miyadagi, badandagi va o‘pkadagi ortiqcha balg‘am va ho‘lliklarni quritish, miyaning eng chuqur yerlaridagi tiqilmalarni ochish xususiyatiga egadir. Shu xossasi bilan u xotira va zehnni kuchaytiradi hamda aqlni o‘tkirlashtiradi. Uni chaynab yurilsa ham yuqoridagi ta’sirlarni ko‘rsatadi va milklarni mustahkamlab, og‘izni xushbo‘y qilib, tomoq va nafas yo‘llaridagi ortiqcha balg‘am va ho‘lliklarni quritib angina va bo‘qoq bezlarini davolab, tomoq og‘riqlarini qoldiradi.
Kundurning Xususiyatlari
Yana unda yaralarni quritish xususiyati ham bor bo‘lib u oshqozon, o‘n ikki barmoqli ichak hamda bavosir (gemorroy) hamda buyrak, qovuq va siydik yo‘lidagi yaralarni ham quritib davolaydi va teridagi toshmalarga ham ijobiy ta’sir ko‘rsatadi. Uning maydalangan talqonini chipqon va ko‘z yaralarga g‘oz yoki bodom yog‘lari va asal bilan aralashtirib bog‘lansa ularni tezda yorib quritadi.
Uning mayin qilib maydalangan kukunidan oz miqdorda olib ko‘zning ichiga sepib turilsa undagi o‘sgan ortiqcha et, kiprik, va qizil qontalash, govmijja va pardalarni yeb ko‘zni nurlantiradi. Uni asalga aralashtirib turli xildagi so‘gallarga qo‘yib bog‘lansa ularni qo‘porib tushiradi.
Kundur yelimi saraton o‘smalari va yaralari hamda ayollardagi «bachadon miomasi» kabi kasalliklar uchun ham sezilarli ta’sirga egadir. Uzum sirkasiga kundur yelimini aralashtirib yuzdagi va badandagi sepkil hamda dog‘larni artilsa ularni ketkazadi.
Ayollar kasalliklari hamda bavosir kasalligida yuz gramm kundur yelimini yuz gramm tog‘ asaliga aralashtirib, noxot kattaligida olib stirillangan bintga o‘rab kasallangan a’zoga kechqurun yotishdan oldin qo‘yib yotiladi va ertalab olib tashlanadi.
Mazkur kasalliklarda va kundur yelimi ishlatiladigan barcha kasalliklarda uni yarim choy qoshiqdan uch mahal och qoringa yigirma kun ichiladi. Uning tutatqisidan jinlar qochadilar, shuning uchun ham uni sehrga qarshi ishlatiladigan dori vositalari qatorida ishlatiladi
